『滴…滴…滴…keep住滴。』喺香港，你同我都應該有比冷氣機水滴中嘅經歷。 橫街窄巷都見到冷氣機滴水嘅問題好嚴重，又滴落啲人個頭，又滴濕哂個地下…除咗受害者燥底，都好影響市容！作為熱愛香港嘅一份子，大家都有責任管理番返好自己班冷氣仔女們。為咗做返個有良心嘅香港市民，大家真係要了解返冷氣機滴水背後嘅起因同解決方法啦～
解決冷氣機滴水 由根源問題做起
好坦白講，其實冷氣機滴水無非都係一個主要原因——污糟！個道理好簡單：長期唔洗機，香港人多車多特別大塵，啲污糟嘢容易積埋積埋，令冷氣機唔同位置出現淤塞問題，唔能夠順利排水，最後唔經大廈中央排水管嘅情況下，以機身邊位滴水嘅形式去水。所以想防止冷氣機繼續滴水，其實唔難，係睇你懶唔懶去清洗。會堵塞嘅地方有三個：
① 底盤排水口
由於底盤排水口係連住一塊小正方嘅去水膠盤仔，好多時啲沙塵同碎屑會好容易積聚咗係表面而導致去水口位塞咗。用家可以定期拆除去水膠盤，將上面啲污垢沙塵擦走，咁小水盤就唔會因為太多水而流出嚟。
② 附加水盤排水孔
有部份家庭為左避免滴水問題，會另裝一個長方形嘅不銹鋼接水盤。但裝咗都唔代表可以保證到滴水問題以後都唔再發生…附加水盤都會好似去水膠盤咁有污物停留係排水口而造成阻塞問題。建議間中喺排水孔附近倒溫水，盡可能溶解和冲走沙塵，避免凝固成堵塞物。
③ 連接底盤 / 接水盤嘅去水膠喉
污糟嘢除咗堵塞排水口，亦有機會流入去水膠管，咁樣淤塞問題係唔會改善到。所以做戲做全套，可以拆條膠喉出嚟沖沖水。亦可以利用長而幼嘅條狀功具清除凝固咗嘅阻塞物，但小心唔好太大力刮裂條膠喉喔～
但有時部機明明都好乾淨，但都仲有滴水問題？例如：師傅嘅裝工都好影響部機能唔能夠順暢去水、膠喉長期暴露係室外，又日曬雨淋，都好容易會出現老化或變形嘅情況。
所以話，冷氣機保養都係一門學問嚟架。
圖片來源：自攝 / SweetHome Electrical
