大家平時買家庭電器嗰陣，有冇發現件產品上面貼咗張彩色嘅長方形Label呢？小編訪問過身邊好多人，原來大家買電器嘅時候都冇去留意呢張label有咩特別。其實呢張彩色嘅貼紙，就係！傳說中嘅『能源標籤』！唔好意思激動咗，但呢張野大家千萬要多睇、多了解、多比較。因為能源標籤其實係對用家買冷氣嚟講非常重要嘅一個條件，買得值唔值就睇今鋪架啦。想知點解買冷氣要留意能源標籤，就唔好錯過下面嘅內容啦～
能源標籤到底搞邊科？
其實上面咁緊張想同大家分享，係因為消費者可以透過能源標籤知道你想買嗰部冷氣機每年耗電量同製冷量係幾多。咁大家就可以比較到唔同牌子唔同型號有咩分別，揀部岩心水嘅冷氣機啦～能源標籤本身有分「確認式」同「級別式」，「確認式」標籤純粹就係廠商證明自己件產品嘅能源效益同效能表現符合「能源效益標籤計劃」最低要求。
「級別式」標籤 慳電第一步
重頭戲！為大家拆解一下「級別式」能源標籤上面有咩內容係對大家有幫助嘅！
.PNG)
① 基本野，標籤將能源效益分為5個級別，一級能源係最高、最能節省能源同電費，五級則為最低。不過唔洗擔心，近幾年全球暖化問題日益嚴重，好多品牌為咗配合環境因素，喺市面上出售嘅冷氣機大部分都係一級能源標籤。
小重點：冷氣機嘅能源標籤係有為淨冷型同冷暖型嘅冷氣機種類而設。以淨冷型嚟講，一級能源標籤嘅冷氣機係比3級能源標籤嘅冷氣機慳23%能源，比5級能源標籤嘅冷氣機慳43%能源。而以冷暖機嚟講，一級能源標籤嘅冷氣機可以比3級能源標籤嘅冷氣機慳18%能源，比5級能源標籤嘅冷氣機慳37%能源架。
②、③ 就字面意思，佢哋就係分別代表部冷氣機嘅每年耗電量同最大製冷量。
冷氣機嘅製冷能源係以『能效比』 (Energy Efficiency Ratio, EER) 嚟做單位表示。 能效比指部冷氣喺製冷量同耗電量上嘅比率，以每一單位耗電量可轉化成幾多製冷量。(計算方式： EER＝製冷量 / 空調系統總電功率) 所以能效比數值愈高代表製冷能源嘅效益相對地就愈高，而且更慳電架～
如果想查詢番相關型號嘅能源標籤資料，可以瀏覽機電工程署網站：
https://www.emsd.gov.hk/energylabel/tc/households/rac/select_ac_result_other.php
入面嘅產品列表型號紀錄冊參考番。都係果句，慳啲慳啲就好多錢錢架啦嗰度～
圖片來源：自攝 / 機電工程署
