【小心買錯】: 唔涼唔凍都有因冷氣匹數要揀啱買錯唔涼無得摱…

2020年12月08日

買冷氣機個店員一定會問你：「想揾幾多匹呀？可以介紹番喎～」比人問就問得多，但大家有無實質了解過『匹數』到底係咩一回事呢？小編有試過揀錯冷氣匹數，搞到電費貴到喊出嚟…為各位用家著想，我覺得有需要分享下冷氣機匹數到底點揀先係最精明最好。匹數嘅由來、點睇法、有咩特別嘅限制要留意，同大家：逐個字～逐個字～逐個認識～

何為匹數？

首先，「匹」係一個功率單位，係冷氣機入面好重要嘅一部份——壓縮機所輸出嘅功率。而匹數簡單嚟講就係部冷氣嘅製冷實力，匹數越大，代表部機嘅製冷能力越強。所以間房嘅面積越大，相對上就係要揀返部匹數越大嘅冷氣機啦。不過留意番，雖然更大嘅匹數可以加強冷氣機嘅製冷能力，但同時用電量亦都更高架～

匹數點睇點揀？

揀匹數有兩樣野一定要知嘅，就係 ①製冷量(BTU) 同 ②平方呎 各自同匹數之間嘅關係。

① 製冷量(BTU)

有好多賣冷氣嘅零售商都會喺產品資料上面寫：XXXXBTU/h，但又唔會寫明個匹數係幾多，搞到顧客R爆頭分唔清（無錯，果個係我…）「BTU」係傳統英制嘅能量單位嚟。所以睇住下面個表，以後唔洗問個staff，自己就可以醒水啦！

3/4匹(HP) 約等於: 6500-7500 BTU/h

1匹(HP) 約等於: 8000-9000 BTU/h

1.5匹(HP) 約等於: 12000-14000 BTU/h

2匹(HP) 約等於: 16000-18000 BTU/h

2.5匹(HP) 約等於: 12000-14000 BTU/h

3匹(HP) 約等於: 20000-28000BTU/h

② 平方呎

頭先有提及過，空間越大，所需要嘅冷氣機匹數越大。有好多買家都會問個裝修師傅自己單位應該用幾大匹數嘅冷氣，以初步嚟講，其實係有個準則可以跟嘅。

80 平方呎(7.42平方米)以下: 可考慮 3/4 匹

100 平方呎(9.29平方米)以下: 可考慮 1 匹

150 平方呎(13.94平方米)以下: 可考慮 1.5 匹

200 平方呎(18.58平方米)以下: 可考慮 2 匹

250 平方呎(23.23平方米)以下: 可考慮 2.5 匹

300 平方呎(27.87平方米)以下: 可考慮 3 匹

唔涼唔凍都有因!?

準則還準則，都係只供參考，有時都要注意番本身單位嘅設計同座向嘅問題。有幾種情況通常會建議客人買大半匹至一匹，例如：冷氣機的安裝位置高度、冷氣機散熱位空間不足、冷氣機位置比陽光直射或靠近廚房、西斜單位、屋內樓底較高及有較長的走廊等。當然如果屋內人數多，或者門窗冇關好等都喺唔涼唔凍嘅其中因素。所以住客除咗睇個單位本身有幾大，都要諗諗你所在嘅位置有冇特別限制啦～

選購攻略