相信大家買冷氣嘅經驗應該點都有啦，但作為用家嘅你，有無留意過隨機附送咗張深藍色、閃閃哋、細細張嘅貼紙呢？呢張野認真，好有用，千其唔好隨手就掉咗佢！如果你依家部冷氣買咗無耐，但商家無比呢張貼紙你，記得追九條街都要拎番尼。今篇為大家介紹返冷氣機嘅『4電1腦標籤』係乜東東，又有咩咁重要！
無端端點解會有4電1腦標籤？
4電1腦標籤喺2018年8月已經正式實施，目的係想透過回收同循環再造舊電器，減低廢物棄置對環境造成嘅傷害。而冷氣機就係計劃入面其中一樣須要回收再造嘅電子產品。所以依家你換新冷氣機，零售商會提供屬於冷氣機系列嘅4電1腦標籤比你，並且有責任幫你預約或安排上門回收舊冷氣架～
有關4電1腦標籤 精明的你要知嘅野…
① 4電1腦標籤必定係由廠商免費提供
計劃暫時實行咗2年有多，遞交比環境保護署嘅循環再造徵費都係由供應商或零售商去比嘅。根據《產品環保責任條例》，「所有受管制電器嘅零售商，必須主動通知消費者有關免費提供嘅法定除舊服務，並以書面形式向消費者展示其除舊條款嘅詳細資料。」所以之後你去買冷氣機，間舖頭向你收取張標籤嘅費用…你就知咩事啦…
② 無4電1腦標籤 都有方法做舊機回收
就算你唔見咗張標籤或你部舊冷氣當時係唔屬於4電1腦標籤嘅計劃內，你都有方法可以處理部舊機架。第一，『綠在區區』服務。香港依家有9個地區設有由非牟利團體負責嘅資源回收部去接收舊電器，例如：葵青、深水涉、觀塘同元朗等。第二，廢舊電器回收車。架車被安排咗會每星期週六同週日，輪流去全港18區進行回收服務。市民可預早上網睇番每星期將會進行回收嘅地區同實質嘅車輛停泊地點。
轉送門：
『綠在區區』服務：https://www.wastereduction.gov.hk/tc/community/cgs_intro.htm
廢舊電器回收車：https://www.wastereduction.gov.hk/tc/workplace/mwcc_detail.htm
③ 建議唔好隨意將舊電器放係垃圾房
好老實同大家講，雖然呢個計劃生效咗有2年以上，但市民嘅投入度並唔高。小編觀察過，有好多市民其實都會選擇將部舊機掉落垃圾房就算，又唔會比人捉。即使唔會構成罪行，但大家都有責任避免環境污染而停止呢種做法。建議今後買完冷氣都係keep住張4電1腦標籤，大家可以輕輕鬆鬆就有相關人事上尼幫你回收啦～
