「人嘅生命係非常脆弱，但往往出事先有覺悟…」唔知大家對於『搭棚』裝 / 整冷氣有無研究呢？小編咁凝重，都係因為一個安全嘅棚同一個有警覺性嘅師傅係好重要…只要你有一刻大意，輕則重傷執返條命仔，重則就從此同依個世界講再見。就好似上年六月粉嶺有單安全帶扣錯位置而由八樓跌咗落街，最後情況危殆入院…所以希望相關人士可以睇完提醒返自己同身邊嘅人，避免有傷亡嘅發生。
須唔須要搭棚 最好交由師傅決定
我諗呢種小型工程大家平時行街都見唔少，簡單嚟講就係用『狗臂架』做底，承托住竹枝而組成嘅棚架。通常要請師傅搭棚裝冷氣，個單位可能係窗口位直頭冇石屎台位，或者有個台放散熱但離窗口夠遠嘅位置，必須成個人爬出去先裝到。如果唔肯定，建議唔好自行判斷，請返合資格人士上門睇位同做返即場報價啦！
順利完成一單小工程 師傅嘅謹慎同專業係必須
雖然竹棚係屬於小型工程嘅分類入面，但只要係涉及高空工作，都暗藏一定嘅危險性。發生意外嘅原因離唔開兩個主要因素——師傅同棚架。
① 師傅無做足防墮措施
- 所佩戴嘅安全吊帶扣喺唔合適嘅繫穩物或獨立救生繩上
- 固定錨點唔夠穩陣
- 無用防墮器同懸掛繩
② 棚架質素參差
- 用嚟支撐竹枝嘅狗臂架無適當地安裝喺外牆上
- 以破烈或脆弱嘅竹枝搭成
- 棚架個工作台同護欄砌得唔完整
吊棚安全第一 大家萬無一失
搭棚其實都有幾多細節位要跟，特別喺狗臂架同爆炸螺絲上有幾樣野要注意…
① 「T」型狗臂架比起「I」型更易安裝爆炸螺絲
② 每個狗臂架最少要裝上三個爆炸螺絲
③ 安裝喺吊棚嘅爆炸螺絲孔尺寸必須同爆炸螺絲嘅直徑相同
④ 爆炸螺絲要有足夠嘅嵌入深度
呢度只係講咗一部份嘅搭棚小知識比大家，合資格嘅搭棚師傅真係要顧及好多細節同經驗先可以進行一個順利嘅裝機小工程架！對於各位師傅同工人嘅心機同付出，小編表示respect呀～
圖片來源：自攝
