「唔該，我想買部淨冷掛牆機呀。」呢句我諗好多用家買冷氣時都講過，但當個sales回應：「想要定頻定變頻機咁呢？」好多人係呢刻都會啞咗…心諗：「有分別架咩…」揀冷氣除咗要知個機種之外，定頻、變頻都要搞清楚架。所以今次呢篇文章就係為咗果啲準備入伙或第一次自己去買冷氣嘅人而設嘅，睇完先去買冷氣就唔洗比人問到口啞啞啦～
定頻同變頻…有咩分別？
定頻：定頻式冷氣個運作模式可以話係彈出又彈入。話明係定頻，佢個供電頻率係唔可以改變，所以個壓縮機都會以『開下又停下』嘅模式運行。當室內氣溫已經下降到指定溫度，壓縮機就會自動停止運作。等到室內氣溫再次回升番嘅時候，壓縮機又會再次啟動番。呢個一開一閂嘅運作模式就解釋到點解部份用家話明明開咗冷氣但時熱時凍。
變頻：變頻式冷氣同傳統定頻式冷氣最大分別就係在於壓縮機嘅運作模式上。同定頻式相反，變頻式嘅壓縮機識得根據室內氣溫自動調節壓縮機嘅運轉快慢，令你唔會有過凍或突然唔涼嘅情況出現。變頻式冷氣機除左會自動改變需要䆁出嘅冷、熱空氣外，有部份品牌仲可以調較埋抽濕模式。
你應該選擇定頻式定變頻式？
① 先決定買窗口機定分體機
小編有出過一篇係介紹冷氣機機種架，強調建議大家去參考番～【~撳我睇相關文章~】點解要諗咗買咩機種先呢？因為市面上嘅窗口機大多數都係定頻式，如果你想揀變頻式窗口機，可選擇嘅品牌就會變得好少。相反變頻式分體機嘅選擇就多好多，所以通常揀買分體機嘅用家都會揀埋變頻式。
② 變頻式冷氣性能上優勝嘅地方
正正因為變頻式壓縮機嘅運行模式唔同以往定頻式，佢有幾種明顯嘅好處：溫差較細。變頻式會根據情況自動調節空間溫度，唔會突冷突熱；電費較平。變頻式唔會又開又閂，自動調低壓縮機運轉速度，一年內可以慳唔少電；雜聲較細。小編定頻同變頻式都體驗過，變頻式毫無疑問真係靜好多，適合須要喺寧靜空間先訓得著嘅人。而定頻式冷氣嘅運作模式始終簡單過變頻式，可能相對上價錢都會平返少少。
總括尼講，要買定頻還是變頻機之前，建議先考量下自己屋企個單位設計上適合邊一類機種，再比較下想要嘅性能同品牌，想揾部啱心水嘅冷氣話都無咁易啦～
