第一，移動式冷氣有個明顯嘅受歡迎之處係底盤有滾輪，方便你隨時移去想要嘅位置。呢個的確係一個好處，但小編認為呢樣對普遍香港人嚟講唔係重點。因為香港土地供應不足問題咁嚴重，寸金尺土，基本上間房都唔會大得去邊，都無咩空間比你移嚟移去，不如話佢係佔空間好似仲合理…

第二，移動式冷氣並唔係想像中咁易安裝，與其話難，不如話攰…由於部機其實都唔細部又唔輕，一個人自己住買機自己裝都唔好話唔攰。雖然移動式冷氣不嬲標榜安裝過程輕鬆簡單，但對安裝或砌機無概念嘅用家嚟講，都唔係話咁易就搞掂嘅事。尤其係夏天間房如果無冷氣又細，裝得嚟都已經熱到傻。

第三，移動式冷氣係個單位本身有推拉窗先可以輕鬆安裝到。喺台灣，有好多單位設計上都採用推拉窗，但相反香港就比較少見，多數以平開窗或射窗為主。所以即使隨機送埋窗口架比你都無咩用…反而最後都係要請師傅上嚟幫你開玻璃駁返條排氣軟管，到頭來搞咁多野可能裝窗口機仲實際。